1Cor 12 | BDD | STEP | Ciyagwao, nuwanuwagu ma Yehoba 'ina heguyai yaluyaluwada weyahidi yalihasi ma wasanapu.

1 Corinthians 12

Yehoba 'ina heguyai yaluyaluwada weyahidi

1 Ciyagwao, nuwanuwagu ma Yehoba 'ina heguyai yaluyaluwada weyahidi yalihasi ma wasanapu. 2 Weyahina mwalo tupwa guguyou 'oina wamiyamiya ta hali 'ebe hemisao 'oidiya watagwalegomiya, taudi geya sawasawahidi ma sigwae, ma hesi si'abowegomiya. 3 Ta bewa tutaina 'eguma taiya Yehoba yaluyaluwana 'oina 'imiyamiya, geya Yesu 'ida heliyeya, ma hesi 'i'ahwa Badae; weyahina geya 'eta taiya sawasawahina ma Yesu 'i'ahwa Badae, 'eguma geya Yaluyaluwa Tabuna 'oina 'imiyamiya.

4 Yaluyaluwa Tabuina 'aigeda tuwamo, ma hesi 'ina heguyai 'oida hagana ma hagana. 5 Cida Badaina wete 'aigeda tuwa, ma hesi 'ina paihowa tapaipaihowadi hagana ma hagana, 6 ma lamudi 'aigeda tuwamo, beno Yehoba, weyahina tauna 'ina heguyaiyedi 'adi paihowa 'i'abihe latuwediya.

7 Ma Yaluyaluwa Tabuna 'ina 'ehele 'aigeda 'aigeda 'oida beno mabwaiyada 'ada lema weyahina, 8 ta hesi hagadi, weyahina loheya 'aigeda 'ana heguheguyai nuwatuhu, ma 'aigeda sanapu, ginaula dahwadahwaina weyahina, 9 ta 'aigeda hemisa, ma 'aigeda to'abi hebwebwe'ana, 10 ta 'aigeda ginaula 'ebe nuwahenainaida 'ana paihowa, ma 'aigeda Yehoba 'ina nuwatuhu 'ana palopisai*, ma 'aigeda yaluyaluwao 'adi 'inana 'abehega bwebwe'ana bo galana, ma 'aigeda wete hali 'enana 'oidiyega 'ihegwaegwae, ta 'aigeda wete 'enanaedi 'ana tobui. 11 Heguheguyaiyedi Yaluyaluwa Tabuna tauna 'ana hesinuwa, ma 'iheguheguyai 'aigeda 'aigeda 'oida, ta 'i'ebwaegita ma gide tapaihowa 'ese.

Wahi 'aigeda ma yahunao baibaiwadi

12 Tauda gide wahi 'aigeda weyahina tasanapuya 'abehega wahi 'aigeda, ma yahunao baibaiwadi. Wahiina beno Keliso, ma yahunaowedi tauda. 13 Weyahina mabwaiyada tababitaiso, Yaluyaluwa 'aigeda 'oinega eeta taheboda 'aigeda. Tauma meYudiya ta 'omi hali tupwao 'oidiyega, ta tomiya mwau ma tomiya bwebwe'ana, ta mabwaiyada taheboda 'aigeda pwaiya Yaluyaluwa Tabuina 'oinega, tauna 'oida 'imiyamiya.

14 Eeta wahi yahunao geya 'aigeda, ma hesi baibaiwadi hagadi ma hagadi. 15 Ceguma 'ahe 'igwae, “Taugu geya wahi 'ina boda 'oina yamiyamiya, weyahina taugu geya nima,” 'ina gwaeina geya gwae moisa.

16 Wete gide 'eguma tena 'igwae, “Taugu geya wahi 'ina boda, weyahina taugu tena, ta geya mata,” tena 'ina gwaeina geya gwae moisa. 17 Weyahina 'eguma matamo beno geya sawasawahina ma 'ihesagoha, ma wete 'eguma tenamo geya sawasawahina ma mahai 'iniso, 18 ta Yehoba bewa gide 'inuwatuhuya ta yahu baibaiwadi 'idi paihowa 'i'ebwaediya.

19 Weyahina 'eguma yahu 'aigeda tuwa, beno geya wahi mabwaiyana. 20 Coinega wahi 'aigeda 'ipaihoweya, ma hesi yahunao baibaiwadi.

21 Geya sawasawahina ma mata nima 'oina 'igwae, “Genuwagu 'owa.” Ma wete geya sawasawahina ma deba 'ahe 'oina 'igwae, “Genuwagu 'owa.” 22 Ta tupwadi wete wahi yahunao 'adi 'ita gide we'adi, ma hesi 'idi paihowa madouna wahi 'ana lema weyahina. 23 Tupwana wete yahudao geya tahepwatuwedi, ma weyahidi tahedeba mwadina, ma hesi ta'itayahidi ta ta'ahusamudi, 24 ta geya yahudao mabwaiyadi 'adi 'itayahina gide. Weyahina Yehoba wahida 'ihemasaleheya ma 'abehega yahunaowedi taudi geya 'adi hepwatumo ta'itayahi bwaibwainidi.

25 Ma 'oinega sahena wataha 'ilatulatu wahida yahunao 'oidiya. Ma hesi mabwaiyadi sihemahemahetena ma mabwaiyadi sihelemalema 'idi paihowao 'oidiya. 26 Weyahina 'eguma yahuda 'aigeda 'imuya, beno wahida mabwaiyana simuya. Wete 'eguma wahida 'aigeda ma'ina yaliyaya, beno wahida mabwaiyana siyaliyaya. 27 Coinega 'aigeda 'aigeda tauda Keliso yahunao, 28 weyahina 'ida paihowao hekalesiya 'alona hagana ma hagana. Yehoba 'iheguyaiyediya 'oida, nugeta tauma Keliso 'ana tohepwailao, ta muliyetega palopitao taudi Yehoba 'ina nuwatuhuwao sihehepwaile nugete, muliyetega tohe'itao, ma ginaula 'ebe henainaida 'adi topaihowao, ma to'abi hebwebwe'ana, ma to'abihetenao, ma tohanugetao, ta taudi hali 'enana 'adi tohegwaegwaeyao.

29 Weyahina geya sawasawahina ma mabwaiyada paihowa 'aigeda tuwa 'oina tahetopaihowa Keliso weyahina, nuwana Yesu tetelina 'ana tohepwailao, nuwana palopitao, nuwana tohe'itao, nuwana ginaula 'ebe henainaida 'adi to'abihelatuwao, 30 nuwana to'abihe bwebwe'ana, nuwana hali 'enana 'ana togwaeyao, nuwana hali 'enanaedi 'adi tobui. 31 Paihowaedi mabwaiyana Yehoba 'iheguyaiyeya 'oida, 'oinega 'ilobwainegomiya ma heguheguyai bwebwe'adi nuwami 'i'ewa, ma wete 'eda 'ausalana moisa yahe'itegomi, beno helau.